मराठा आरक्षणासाठी गेले आणखी दोन जीव !

शोध न्यूज : अवघा मराठा समाज आरक्षणाकडे डोळे लावून बसलेला असताना, आणखी दोन मराठ्यांचे बलिदान झाले आहे. वाढत्या आत्महत्या ही चिंता वाढविणारी बाब  आहे.

मराठा समाजाला आरक्षण मिळावे म्हणून, मराठा योद्धा मनोज जरांगे पाटील संपूर्ण समाजाचे नेतृत्व करीत आहेत. अवघ्या महाराष्ट्रातील वातावरण ढवळून निघाले असून, मनोज जरांगे पाटील यांना अभूतपूर्व पाठींबा मिळत आहे. मराठा आरक्षण मिळणारच असे ते निर्धारपूर्वक सांगत आहेत तर, छगन भुजबळ यांच्यासह काही ओबीसी नेते, मराठ्यांच्या विरोधात उघडपणे समोर आले आहेत. भुजबळ यांनी नुकत्याच केलेल्या भाषणाचा निषेध राज्यभर होऊ लागला आहे. त्यांच्या प्रक्षोभक भाषणामुळे दंगलीची परिस्थिती निर्माण होण्याचा धोका देखील व्यक्त केला जात आहे. राज्यातील सरकारमध्ये ते मंत्री असूनही अशा पद्धतीची वादग्रस्त विधाने  त्यांनी केली आहेत याबाबत अनेकांनी नापसंती व्यक्त केली आहे. ओबीसी समाज आणि मराठा समाज हे समन्वयाने रहात असताना देखील नेते मंडळी समाजात दुही निर्माण करण्याचा प्रयत्न करतांना दिसत आहेत. एकीकडे हे सगळे सुरु असतानाच मराठा तरुणांच्या आत्महत्या सुरूच असल्याचे दिसत आहे.

मराठा आरक्षण मिळावे म्हणून  आजवर अनेक तरुणांनी आत्महत्या केल्या आहेत. अजूनही आत्महत्या थांबायचे नाव घेत नसून आता पुन्हा नांदेड आणि बीड जिल्ह्यात अशा अप्रिय घटना घडल्याचे समोर आले आहे. मला मराठा आरक्षणासाठी क्रांती घडवायची आहे असे म्हणत नांदेड वाघाळा परिसरातील साईनाथ टरके या ३२ वर्षे वयाच्या मराठा  तरुणाने, आपल्याच घरी गळफास घेत आत्महत्या केल्याची घटना समोर आली आहे. 'मी मराठा आरक्षण क्रांतीसाठी जीवन संपवत आहे. एक मराठा, लाख मराठा'  असे लिहिलेली एक चिट्ठी देखील त्याच्या खिशात सापडली आहे.   या घटनेची माहिती मिळाल्यानंतर शेकडो कार्यकर्ते रुग्णालयात पोहोचले होते. जमलेल्या मराठा कार्यकर्त्यांनी यावेळी मोठी हळहळ व्यक्त केली.

बीड जिल्ह्यातील मोरगाव येथे घडलेल्या दुसऱ्या घटनेत, ५३ वर्षीय मराठा बांधवाने मराठा आरक्षणासाठी प्राण त्याग केला आहे,  मराठा आरक्षण लढ्यात नेहमी पुढे असणारे श्रीमंत भगवान जोगदंड (वानगाव ) यांनी गळफास घेवून आत्महत्या केली आहे. (Two more lives for Maratha reservation ) या घटनेने मराठा समाजाला मोठा धक्का बसला असून, त्यांच्या खिशात 'मराठा आरक्षण, 'एक मराठा, लाख मराठा'  असा मजकूर असलेली चिट्ठी आढळून आलेली आहे. या दोन्ही घटनांनी मराठा बांधव पुन्हा एकदा हादरून गेले असून, आत्महत्या हा काही आरक्षणाचा मार्ग नाही, त्यामुळे तरुणांनी अशा प्रकारे टोकाचे पाऊल उचलू नये असे आवाहन देखील करण्यात येत आहे.