बेपत्ता अभियंत्याचा ठावठिकाणा नाही, पोलिसांकडून कसून शोध !

पंढरपूर  : कुटुंबासह आत्महत्या करण्याची सूचना देवून महावितरणचे  सहायक अभियंता आपल्या कुटुंबासह नॉट रिचेबल असल्याने चिंता वाढली असून अद्यापही या कुटुंबाचा शोध लागला नाही. 

महावितरणच्या भोसे शाखेत कार्यरत असलेले सहायक अभियंता गणेश वगरे कुटुंबासह बेपत्ता झाल्याने त्याची नोंद पोलीस ठाण्यात झाली आहे आणि परिस्थितीचे गांभीर्य ओळखून पोलिसांनी देखील तातडीने त्यांचा तपास सुरु केला आहे तथापि अद्याप त्यांचा काहीच ठावठिकाणा मिळाला नाही त्यामुळे तर अधिक चिंता व्यक्त होताना दिसत आहे. पोलिसांनी त्यांच्या शोधासाठी दोन पथके तयार केली असून पोलिसांकडून शोध घेण्यात येत आहे. वगरे यांचे कॉल रेकोर्डिंग, टोळ नाके आणि फास्ट टॅग या सगळ्यांची तपासणी करणे सुरु आहे. महावितरण कर्मचारी, वगरे यांचे नातेवाईक यांचीही पोलिसांना मदत होत असून लवकरच या कुटुंबाला शोधून काढू असा विश्वास उप विभागीय पोलीस अधिकरी विक्रम कदम यांनी व्यक्त केला आहे. 

महावितरणचे सहायक अभियंता वगरे यांच्या बेपत्ता होण्याने आणि कुटुंबासह आत्महत्या कारण्याबाबतच्या त्यांच्या सुसाईड नोटमुळे महावितरण अधिकारी आणि कर्मचारी देखील तणावात आले आहेत. तथ्यहीन तक्रारी होत असतील आणि त्यामुळे होणार मानसिक त्रास एवढ्या टोकाला जात असेल तर काम कसे करायचे असा प्रश्न महावितरण कर्मचारी अधिकारी यांच्यापुढे पडला आहे. पटवर्धन कुरोली येथील तक्रारीबाबत चौकशी करण्यात आलेली असून  तक्रारीत काही तथ्य आढळले नसल्याचे महावितरण कडून सांगण्यात आले आहे. वगरे यांनी कोणतेही अनुचित पाऊल न उचलता जेथे असतील तेथून त्यांनी परत यावे असे आवाहन महावितरणचे कार्यकारी अभियंता संजय गवळी यांनी केले आहे. 

नेमके काय घडले !

महावितरणच्या भोसे येथील शाखेचे सहाय्यक अभियंता गणेश वगरे हे आपली पत्नी आणि दोन मुलींसह गुरुवारी ३ फेब्रुवारीच्या सायंकाळी  बेपत्ता झाले आहेत. त्यांनी काही लोकंची नावे नमूद करून आपण कुटुंबासह आत्महत्या करण्याचा निर्णय घेतला आहे अशी सूचना देवून वगरे कुटुंब कालपासून बेपत्ता झाले आहे. करकंब पोलीस त्यांचा शोध घेत असून काल वगरे यांचे शेवटचे लोकेशन सांगोला तालुक्यात असल्याचे दिसून आल्याने सांगोला पोलिसांना देखील सतर्क करण्यात आले आहे. वगरे कुटुंबाचा मोबाईल देखील नॉट रिचेबल असल्याने चिंता वाढली असून करकंब आणि भोसे परिसरात या घटनेने खळबळ उडवून दिली आहे. 

महावितरण कंपनीत सहाय्यक अभियंता असलेल्या वगरे यांनी आपण कुटुंबासह आत्महत्या करण्याचा दृढ निश्चय केला असल्याचे म्हटले आहे त्यामुळेच अधिक चिंतेचे वातावरण निर्माण झाले आहे. त्यांनी काही व्यक्तींची नावे नमूद करीत हेच लोक आपल्या आत्महत्येस जबाबदार असल्याचे म्हटले आहे. त्यांच्यामुळेच आपण आत्महत्येस प्रवृत्त झाल्याचे त्यांनी सांगितले आहे. पंढरपूर तालुक्यातील पटवर्धन कुरोली येथील रहिवाशी, एका संघटनेचा पदाधिकारी आणि त्याचा भाऊ यांच्यामुळे आपणास प्रचंड मानसिक त्रास होत आहे. विजेचे बिल न भरल्यामुळे वायरमन यांनी त्यांचा विद्युत पुरवठा खंडित केल्याच्या रागातून हा त्रास दिला जात आहे. स्थानिक वर्तमानपत्रात बातम्या छापून आणून आपली नाहक बदनामी केली जात आहे . या बदनामीमुळे आपण आणि आपले कुटुंब नैराश्यात गेलो आहोत. याच नैराश्यातून आपण पत्नी आणि दोन मुलींसह जीवनयात्रा संपविण्याचा दृढनिश्चय केला आहे असे त्यांनी म्हटले आहे. 

एका संघटनेचा पदाधिकारी, त्याचा भाऊ आणि दोन पत्रकार यांनी आपणास आत्महत्येस प्रवृत्त केले असून आपल्या पाठीमागे माझी नाहक बदनामी करणाऱ्याना कुठल्याही प्रकारची दया दाखवू नये, माझे हसते खेळते कुटुंब त्यांच्या नाहक त्रासामुळे उध्वस्त होत आहे. समाज माझ्याकडे चांगल्या नजरेने पाहत होता पण आता तो संशयाने पाहत आहे त्यामुळे माझ्यासह माझ्या कुटुंबाचे मानसिक खच्चीकरण झाले आहे, त्यातूनच हे टोकाचे पाउल उचलत असल्याचे देखील त्यांनी म्हटले आहे. वगरे हे मुळचे पंढरपूर तालुक्यातील पांढरेवाडी येथील आहेत. पांढरेवाडी येथील सरपंच दगडू कांबळे, माजी सरपंच सज्जन भोसले, महावितरणचे कर्मचारी आदींनी वगरे यांची पोस्ट पाहून काल  करकंब  पोलीस ठाणे गाठले. पोलिसांनी देखील तातडीने या प्रकरणाची दखल घेत तपास सुरु केला पण वगरे यांचा शोध लागला नाही. 

सांगोला तालुक्यातील वाटंबरे- निजामपूर रोड परिसरातील त्यांचे लोकेशन मिळाले पण वगरे यांनी आपला मोबाईल बंद ठेवलेला आहे. मिळालेल्या माहितीनुसार वगरे यांच्याकडे पांढऱ्या रंगाच्या हुंडाई गाडी (एम एच १२, एस क्यू ३८१६) आहे. अशी गाडी अथवा संबंधित कुटुंब यांच्याबाबत काही माहिती मिळाल्यास पोलिसांशी संपर्क साधावा असे आवाहन देखील करण्यात आले आहे.  या घटनेने पंढरपूर तालुक्यात खळबळ उडवून दिली असून करकंब तसेच पांढरेवाडी परिसरातून अधिक चिंता व्यक्त होताना दिसत आहे. पोलीस मात्र सर्व मार्गाने वगरे कुटुंबाची माहिती मिळविण्याचा आणि त्यांचा शोध घेण्याचा प्रयत्न करीत आहेत.