डॉल्बीच्या आवाजाने घेतला तरुणाचा जीव !

शोध न्यूज : डॉल्बीचा आवाज सहन न झाल्यामुळे गणपती विसर्जन मिरवणुकीत एका तरुणाचा मृत्यू झाला असल्याची मोठी घटना समोर आली आहे.

कुठलाही कार्यक्रम म्हटलं की अलीकडे तरुणाईला डॉल्बीचे  मोठे आकर्षण असते, वास्तविक कर्कश आवाजामुळे उत्सवाचा आनंदही रहात नाही आणि अनेकांना याचा मोठा त्रास देखील होतो. अशा आवाजाबाबत पोलीसानीही आधीच इशारा दिला आहे. डीजे न लावता आनंदाने गणेशोत्सव साजरा करण्याचे आवाहन, पोलिसांनी गणेशोत्सवाच्या सुरुवातीलाच केले आहे. पण काही जन याकडेही दुर्लक्ष  करीत आहेत. याचाच मोठा फटका एका तरुणाला बसला आणि त्याचा जीव देखील डॉल्बीच्या आवाजाने घेतला आहे.

सांगली जिल्ह्यातील कवठे एकंद येथील गणेश विसर्जन मिरवणुकीत प्रत्येक मंडळाचे डॉल्बी वाजत होते.  सायंकाळी सात वाजल्यापासूनच गावातील चौका चौकात डॉल्बीचा दणदणाट सुरू होता. मिरवणुकीच्या निमित्ताने तासगाव पोलिसांचा बंदोबस्तही तैनात होता. मात्र विविध मंडळांनी तासगाव पोलिसांच्या नाकावर टिचून, तसेच न्यायालयाचा डेसिबल बाबतचा आदेश धुडकावत डॉल्बी सुरू केला होता. (The sound of Dolby took the life of the young man) यादरम्यान डॉल्बीच्या चालकांमध्ये अक्षरशः आवाजाची स्पर्धा लागली. एकमेकांना खुन्नस देऊन आवाज वाढवण्यात आला. या आवाजामुळे गाव हादरत होते.

या मिरवणुकीमध्ये शेखर पावसे हा युवकही आला होता. शेखर याची आठ ते दहा दिवसांपूर्वीच अँजिओप्लास्टी झाल्याचे समजते. तरीही तो गणेश विसर्जन मिरवणुकीत आला होता. रात्री स्टॅन्ड चौकात या मिरवणुका आल्यानंतर डॉल्बीचा आवाज त्याला सहन झाला नाही. अचानक त्याला अस्वस्थ वाटू लागले आणि त्याच्या  छातीत दुखू लागले.  त्याला तासगाव येथील खासगी रुग्णालयात दाखल करण्यात आले. मात्र उपचारापूर्वीच डॉल्बीच्या प्रचंड आवाजामुळे हृदयविकाराचा झटका आल्याने त्याचा मृत्यू झाला. या प्रकरणात जर पोलिसांनी वेळीच हस्तक्षेप करून डॉल्बीच्या आवाजावर नियंत्रण ठेवले असते तर कदाचित शेखरचा जीव वाचला असता. 

शेखर याचा पलूस येथे गाड्यांच्या बॉडी दुरुस्तीचा व्यवसाय होता. कमी वयात युवा उद्योजक म्हणून त्याने नावलौकिक मिळवला होता. त्याला एक ४ वर्षांची मुलगी आहे. या घटनेमुळे सगळीकडे हळहळ व्यक्त केली जात आहे. कुणाच्या तरी डॉल्बीच्या हौसेमुळे एका तरुणाचा जीव गेला आणि एक कुटुंब उघड्यावर पडले ! जबाबदार कोण ?