शोध न्यूज : विठ्ठल सहकारी साखर कारखान्यात उत्पादन विभागात गंभीर स्वरुपाचा अपघात होऊन एका कामगाराचा जागीच मृत्यू झाला असून एक कामगार गंभीर जखमी झाला आहे. या घटनेने साखर कारखाना कामगारात प्रचंड हळहळ आणि चिंता व्यक्त होत आहे.
रस्त्यावर वाहनांचे अपघात होण्याचे प्रमाण वाढलेले असताना आता साखर कारखान्याच्या आतील भागात काम करीत असलेल्या कामगारालाच मृत्यूला सामोरे जावे लागले आहे. विठ्ठल सहकारी साखर कारखान्याच्या बॉयलिंग हाऊसमध्ये काम करीत असताना कामगाराचा प्राण जाण्याची घटना आज घडली असून आता या दुर्घटनेस जबाबदार कोण? असा प्रश्न ऐरणीवर आला आहे. आज सकाळी साडे नऊ वाजण्याच्या सुमारास उत्पादन विभागात ही दुर्घटना घडली आहे. आज रविवार हा सुट्टीचा दिवस असल्यामुळे कारखाना परिसरात वर्दळ नव्हती तसेच कार्यालयीन कामकाज बंद होते परंतु गळीत हंगाम सुरु असल्यामुळे आतील यंत्रणा सुरळीतपणे कार्यरत होती. वेगवेगळ्या पाळीत आतल्या बाजूला काम सुरूच असते आणि हेच काम सुरु असताना आज एका कामगाराला प्राणाला मुकावे लागले आहे. (Major accident in Vitthal sugar factory, worker dies) बंद असलेला साखर कारखाना यावेळी सुरु झाला आणि गळीत हंगाम सुरु होऊन काही दिवस लोटताच आजचा हा प्रसंग घडला.
साखर कारखान्याच्या बॉयलिंग हाऊसमध्ये काम करीत असताना अचानक यंत्रणेत बिघाड होऊन दोन कामगारांचे जीव संकटात आले. पंढरपूर तालुक्यातील सांगवी येथील कामगार सुधाकर सदाशिव चौगुले आणि जळोली येथील सोमनाथ मारुती नरसाळे हे दोन कामगार येथे काम करीत असताना स्टीम वॉल निकामी झाला आणि त्याचा दणका या कामगारांना बसला. उंचीवर काम करणारे कामगार उंचावरून खाली कोसळले आणि यात सुधाकर चौगुले या कामगाराचा जागीच मृत्यू झाला तर सोमनाथ नरसाळे हे कामगार गंभीर जखमी झाले आहेत. जखमी कामगाराला तातडीने रुग्णालयात दाखल करण्यात आले परंतु त्यांची प्रकृती गंभीर असल्याचे सांगितले जात आहे. अचानक घडलेल्या या घटनेने साखर कामगारात खळबळ उडाली असून चिंता देखील व्यक्त करण्यात येत आहे. साखर कारखान्यात काम करीत असताना ही घटना घडली असून एका कामगाराचा जागीच मृत्यू झाल्याने प्रचंड हळहळ व्यक्त होऊ लागली आहे. आता या दुर्घटनेला नेमके कोण जबाबदार आहे ? स्टीम वॉल निकामी कशामुळे झाला ? या प्रश्नाची उत्तरे शोधावी लागणार आहेत.
कोणत्याही टिप्पण्या नाहीत:
टिप्पणी पोस्ट करा
आपल्या प्रतीसादाबद्धल धन्यवाद !